Экскурсия

Бүгін мектебіміздің оқушылары ұстаздармен бірге ауданымыздағы Костычево ауылына ұмытылмас экскурсия жасады. Бұл сапар "Этноаул" жобасы аясында ұйымдастырылып, патриоттық тәрбие беру бағдарламасының бір бөлігі болды. Экскурсия бізді ұлттық мәдениетке, салт-дәстүрге және ата-бабаларымыздың өмір салтына саяхат жасатқандай әсер қалдырды.

Оқушыларды ауылдың қонақжай тұрғындары мен жылы жүзді ұстаздар дәстүрлі тағамдармен қарсы алды. Балалар айналаны қызыға тамашалап, шеберлік сабақтарына белсенді қатысты — сүттен қаймақ шайқап, жүн иіріп, мата тоқыды, тары түйіп, жент жасап, бауырсақ пісірді және тағы басқа көптеген ұлттық кәсіптермен танысты. Тіпті батыл балалар атқа мініп серуендеп келді. Қазақтың ұлттық ойындарын да ойнады.

Экскурсия тек танымдық қана емес, эмоциялық жағынан да өте бай болды. Мектебіміздің барлық оқушылары мен ұстаздарының атынан Костычево ауылының қонақжай, мейірімді тұрғындарына, ұстаздар мен ата-аналарға шын жүректен алғысымызды білдіреміз. Сіздердің мейірімділігіңіз, ашық көңілдеріңіз және дәстүр, мәдениет пен тарих жөніндегі білімдеріңізбен бөлісуге деген дайындықтарыңыз бізге ұмытылмас әсер қалдырды. Сіздерге зор денсаулық, амандық және халқымыздың бай мұрасын сақтап, оны кейінгі ұрпаққа жеткізудегі еңбектеріңізге толағай табыс тілейміз!

Тәрбие ісі жөніндегі орынбасар
Мурзабекова М.М.